អតីតស្នងការរងខេត្តកណ្ដាល អុល ប៊ុណ្ណា ត្រូវបានកម្លាំងសមត្ថកិច្ចក្រុងសំពៅពូន ឃាត់ខ្លួនពាក់ព័ន្ធករណីគំរាមកំហែងយកប្រាក់ពីជនរងគ្រោះជាជនជាតិចិន នៅក្នុងទីតាំងការដ្ឋានសំណង់មួយ

(កណ្ដាល)៖ អតីតស្នងការរងខេត្តកណ្ដាល អុល ប៊ុណ្ណា ត្រូវបានកម្លាំងសមត្ថកិច្ចក្រុងសំពៅពូន ឃាត់ខ្លួនពាក់ព័ន្ធករណីគំរាមកំហែងយកប្រាក់ពីជនរងគ្រោះជាជនជាតិចិន នៅក្នុងទីតាំងការដ្ឋានសំណង់មួយ ស្ថិតក្នុងភូមិកំពង់ថ្កុល សង្កាត់សំពៅពូន ក្រុងសំពៅពូន។

តាមរបាយការណ៍ ជនរងគ្រោះឈ្មោះ XIONG PAN ភេទប្រុស អាយុ ២៨ឆ្នាំ ជនជាតិចិន បានដាក់ពាក្យបណ្ដឹងនៅថ្ងៃទី១៣ ខែមេសា ឆ្នាំ២០២៦ បន្ទាប់ពីត្រូវបានជនសង្ស័យឈ្មោះ អុល ប៊ុណ្ណា ភេទប្រុស អាយុ ៤៣ឆ្នាំ មុខរបរមន្ត្រីនគរបាល និងបក្ខពួកចំនួន ៤នាក់ផ្សេងទៀត (មិនស្គាល់អត្តសញ្ញាណ) ធ្វើសកម្មភាពគំរាមកំហែងយកប្រាក់ជាបន្តបន្ទាប់ ចាប់ពីថ្ងៃទី០៦ ដល់ថ្ងៃទី១៣ ខែមេសា ឆ្នាំ២០២៦។

ប្រភពដដែលបន្តថា ជនសង្ស័យបានអះអាងថា ថៅកែក្រុមហ៊ុនមួយជំពាក់ថ្លៃអ៊ីនធឺណិតចំនួន 132,271 ដុល្លារអាមេរិក ហើយបានបង្ខំឲ្យជនរងគ្រោះ ដែលមិនពាក់ព័ន្ធ ទូទាត់ប្រាក់ជំនួស ដោយគំរាមថា នឹងចាប់ខ្លួន និងបិទការដ្ឋានសំណង់ ប្រសិនបើមិនព្រមអនុវត្តតាម។

ដោយសារភ័យខ្លាច ជនរងគ្រោះបានខ្ចីប្រាក់ពីមិត្តភក្តិ ប្រគល់ឲ្យជនសង្ស័យចំនួន 32,271 ដុល្លារអាមេរិក ហើយត្រូវបានបង្ខំឲ្យធ្វើកិច្ចសន្យាជាភាសាចិន។ មិនត្រឹមតែប៉ុណ្ណោះ នៅថ្ងៃទី១១ ខែមេសា ជនសង្ស័យបានបន្តគំរាមតាមបណ្ដាញ Telegram ទាមទារប្រាក់បន្ថែមចំនួន 5,000 ដុល្លារអាមេរិក ជាថ្លៃ “ការពារ និងហត់នឿយ”។

លុះដល់ថ្ងៃទី១៣ ខែមេសា ឆ្នាំ២០២៦ នៅវេលាម៉ោងប្រមាណ ១៧ និង ៣០នាទី ខណៈពេលជនសង្ស័យមកទាមទារប្រាក់បន្ថែមម្ដងទៀត ជនរងគ្រោះបានរាយការណ៍ទៅសមត្ថកិច្ចភ្លាមៗ បណ្ដាលឲ្យកម្លាំងជំនាញធ្វើការឃាត់ខ្លួនជនសង្ស័យបានតែម្តង ខណៈបក្ខពួកផ្សេងទៀតកំពុងរត់គេចខ្លួន។

ក្នុងប្រតិបត្តិការនេះ សមត្ថកិច្ចបានដកហូតវត្ថុតាង រួមមានប្រាក់សុទ្ធចំនួន 5,000 ដុល្លារអាមេរិក និងទូរស័ព្ទចំនួន ២គ្រឿង ខណៈប្រាក់ចំនួន 32,271 ដុល្លារអាមេរិក ត្រូវបានរាយការណ៍ថាបាត់បង់រួចហើយ។

គួរបញ្ជាក់ថា ក្រសួងមហាផ្ទៃក៏ធ្លាប់បានចេញវិធានការរដ្ឋបាល ដោយសម្រេចបន្ថយឋានន្តរស័ក្តិ លោក អុល ប៊ុណ្ណា ពីថ្នាក់ឧត្តមសេនីយ៍ (ផ្កាយ១) មកត្រឹមថ្នាក់វរសេនីយ៍ឯក ក្នុងក្របខណ្ឌនគរបាលជាតិ នៃក្រសួងមហាផ្ទៃ។

បច្ចុប្បន្ន សមត្ថកិច្ចកំពុងបន្តស្រាវជ្រាវ ដើម្បីចាប់ខ្លួនបក្ខពួកដែលនៅសល់ និងចាត់វិធានការតាមច្បាប់យ៉ាងតឹងរឹង។