ភ្នំពេញ៖ លោក ឈិន មករា ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃ០៣ កញ្ញា ឆ្នាំ២០២៦ បានចេញដីកាបង្គាប់ឲ្យឃុំខ្លួនស្ត្រីម្នាក់ដែលជាមេកន្ទុយលេខឆ្នោតវៀតណាម ជ្រកក្រោមស្លាក «វីង» ដាក់ពន្ធនាគារជាបណ្តោះអាសន្ន ជាប់ពាក់ព័ន្ធករណីបើកកន្លែងលេងល្បែងស៊ីសងដោយខុសច្បាប់ ។
តាមដីកាបង្គាប់ឲ្យឃុំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញបានបញ្ជាក់ថា ឈ្មោះ ជា គឹមហុង ហៅ ម៉ី ភេទស្រី កើតថ្ងៃទី០៥ ខែកញ្ញា ឆ្នាំ១៩៩៦ មានទីលំនៅមុនឃាត់ខ្លួនស្នាក់នៅផ្ទះលេខ៥BEO ផ្លូវលេខ១០៩ សង្កាត់វាលវង់ ខណ្ឌ៧ មករា រាជធានីភ្នំពេញ ។ ជននេះ ត្រូវបានដាក់ឲ្យស្ថិតនៅក្រោមការពិនិត្យពីបទ.បើកកន្លែងលេងល្បែងស៊ីសង.ប្រព្រឹត្តនៅផ្ទះលេខ៥BEO ផ្លូវលេខ១០៩ សង្កាត់វាលវង់ ខណ្ឌ៧មករា រាជធានីភ្នំពេញ កាលពីថ្ងៃទី០១ ខែកញ្ញា ឆ្នាំ២០២៦ តាមបញ្ញត្តិមាត្រា៥ នៃច្បាប់ស្តីពីការបង្ក្រាបល្បែងស៊ីសង ។
បើនិយាយពីច្បាប់ស្តីពីការបង្កាបល្បែងស៊ីសងជំពូកទី៣ ទោសប្បញ្ញត្តិត្រង់មាត្រា ៥ «ត្រូវផ្តន្ទាទោសពិន័យជាប្រាក់ពី៥លានរៀល ដល់២០លានរៀល និងដាក់គុកពី១ឆ្នាំដល់ ៥ឆ្នាំ ចំពោះអ្នកបើកកន្លែងលេងល្បែងស៊ីសង និងអ្នកកាន់កាប់ល្បែងស៊ីសងអ្នកចាត់ចែង និងភ្នាក់ងារស៊ីសង ។ ដីកាបានបង្គាប់ឲ្យឃុំខ្លួនជនសង្ស័យដាក់មណ្ឌលអប់រំកែប្រែទី២ (ម២) ជាបណ្តោះអាសន្ន។
សូមជម្រាបថា កាលពីរសៀលថ្ងៃទី១ ខែកញ្ញា ឆ្នាំ២០២៦ កម្លាំងសមត្ថកិច្ចនគរបាលខណ្ឌ៧មករា បានចុះបង្ក្រាបទីតាំងកត់កន្ទុយលេខ «ឆ្នោតវៀតណាម»ដុះស្លែមួយកន្លែង ជ្រកក្រោមស្លាក«វីង»វេរលុយ ស្ថិតនៅផ្ទះលេខ៥E0 ផ្លូវលេខ១០៩ សង្កាត់វាលវង់ ខណ្ឌ៧ មករា រាជធានីភ្នំពេញ ដោយបានធ្វើឃាត់ខ្លួនម្ចាស់ទីតាំងម្នាក់ឈ្មោះ ជា គឹមហុង ហៅ ចែម៉ី អាយុ៣១ឆ្នាំ នឹងបានយកទៅសាកសួរនៅអធិការដ្ឋាននគរបាល៧មករា ត្រៀមកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធី ។
ការបង្ក្រាបទីតាំងកត់កន្ទុយលេខឆ្នោតវៀតណាមខាងលើនេះ ដឹកនាំកម្លាំងដោយលោកវរសេនីយ៍ឯក ជុន ប៊ុនណាន អធិការនៃអធិការដ្ឋាននគរបាលខណ្ឌ៧ មករា ក្រោមការសម្របសម្រួលពីស្ថានប័នអយ្យការអមសាលាដំបូងរាជធានីភ្នំពេញ ។
គួរកត់សម្គាល់ថា ទីតាំងកត់ឆ្នោតវៀតណាម ហៅកន្ទុយលេខខាងលើនេះ ជ្រកក្រោមស្លាក«វីង»វេរលុយ កើតឡើងជាច្រើនឆ្នាំមកហើយ ដោយគ្មានអ្នកណាដឹងថា ជាកន្លែងប្រព្រឹត្តបទល្មើសល្បែងស៊ីសងដែលច្បាប់បានហាមឃាត់នោះឡើយ ព្រោះកន្លងមក អ្នកនិយមចាក់កន្ទុយលេខ ឆ្នោតវៀតណាមនេះ ភាគច្រើនស្ត្រីដែលធ្វើដំណើរទៅផ្សារទិញម្ហូបអាហារ ប៉ុន្តែក៏មានអ្នកស្នេហាល្បែងស៊ីសងកន្ទុយលេខខ្លះទៅចាក់បន្តកន្ទុយគ្នាដែលរូបភាពមើលទៅហាក់បីដូចជាអតិថិជនទៅវេរលុយ ឬដូរលុយ ក្រោមស្លាក«វីង»មួយកន្លែងនោះដែរ ការពិតជាទីតាំង ចែម៉ី ប្រព្រឹត្តបទល្មើសល្បែងស៊ីសងកន្ទុយលេខឆ្នោតវៀតណាមរាប់ឆ្នាំមកហើយ បើកុំមានការបែកធ្លាយពីអ្នកចាក់ចាញ់ (អស់ខោ) ជំពាក់មេដើរនិយាយពីទីតាំងនោះ រហូតដឹងដល់សមត្តកិច្ចទើបមានការចុះបង្ក្រាប និងចាប់ម្ចាស់ទីតាំងយកទៅអនុវត្តច្បាប់ «ដុសក្អែលចេញម្តង» ៕